بيني وبين نفسي شكد افكر بيك
واكول اشمعنة انت الشاغل ظنوني؟؟
مو اول عشك خاطر تشل الحال
ولا اول جمال تشوفك عيونـــــي...
شجاهة الروح يمك ذبت الأسرار
وليش ارجف عليك وينخطف لونــــي؟؟
وحتى الناس كامت تعرف بهالحال
وما اعرف شكلهم من يسألونـــــــي...
يطبون بصفنتي وعنك يدورون
ويلكوني افكر بيك يلكونــــــــي...
وصاحت ،كلهة صاحت: هذا هذا فلان
وما عندي لكوك وبيك تهمونــــــي...
تهموني بمحبتك والله لو يدرون
على ضيم العلي يظل يواسونــــــي..
مايدرون عايفني بمهب الريح
و آنه وياك عفت المايعوفونــــــــي...
يحبوني شكثر ولجيتي يتانون
واخجل من كثر ماكـــام يتنونــــي...
وانت الماتحبني شلون بالله وياك؟
امرن بيك،ما مر باليحبونــــــــــي...
عفت اللي شروني ومن ارد شلون؟
هم اسوة بعد والنوب يشرونـــــي؟؟
حبيتك شجاني وما حسبت حساب
خيعونك علي..مو آنه خيعونــــــــي....
متحبني واحبك، والمصيبة النوب
اريدك وانهزم من اليريـدونـــــــــي...
ومن دونك صرت ماعيش وية الناس
وبفراحك ابد ما تذكر سنــــونــــي...
من سمعوا اهلنة العشك دك الباب
ما خلوك اهلك واهلي خلونـــــــي....
ما خلوك اهلك...حقهم يخافون
بس اهلي لمحبتك شلع باعونـــــي...
